Ordo ac Series [rerum gestarum in parentatione] Trigesimae diei post mortem RR: DD: Theobaldi II. et in Electione RR: Perillustris et Amplissimi DD: Ottonis I. Anno .1779.
Ordnung des Todengedenkens am 30. Tag nach dem Ableben von Abt Theobald II. Reitwinkler († 07.02.1779) und der Neuwahl seines Nachfolgers Otto Doringer am 14.04.1779. Quelle: BayHStA Kloster Aldersbach "Archivalien" 517.
Decima die Aprilis RR: PP: Granarius et Prof. Balduinus cum Domino Iudice circa horam 7. matutinam abierunt in Peitlspach, exspectaturi ibidem adventum RR: DD: Abbatis de Cella Principum ceu Praesidis delegati ad futuram Electionem. Interea Domi res divinae in Choro quadrante post horam octavam fuerunt persolutae. Postquam vero circa horam decimam nuntiatus est adventus RR: DD: Praesidis, illico omnes campanae non modo in turri maiore, sed et ad Portam monasterii et ad S. Petrum ac in monte S. Bernardi pulsabantur. Ven. Conventus autem præeunte capitulari cruce ad ingressum ecclesiæ in area exteriori substitit, et advenientem RR: DD: Præsidem cum suo Secretario excepit, qui dein præeuntibus binis ac binis RR: FF. et RR: PP: ascendit in Ecclesiam, acceptaque ex manu V: P: Prioris aqua lustrali in ingressu ecclesiae, mox perexit ad Tumbam in navi ecclesiae erectam, recitatoque Psalmo De Profundis et collecta Deus, qui inter alta voce, respondente V: Conventu, aspersaque lustrali aqua divertit ad aram S. Crucis, factaque ibidem in Scamno præparato adoratione V: Sacramenti, præeunte iterum post crucem capitularem V. Conventum per ambitum Claustri ad cubile deductus est.
Finito prandio tentabat equidem RR: DD: Præses privatim cum singulis et V: Conventu colloqui, ipsorumque mentem explorare circa quædam observanda in actu Electionis: Verum quia plurimi et DD: Expositis adhucdum desiderabantur, qui fortasse contra tale colloquium protestatione possent excipere, hinc RR: DD: Præses æquitate rei perspecta integrum negotium dimisit, obsignationem vero Abbatiæ consuetam per P. Secretarium fieri iussit.
Dies undecima præcipue consumta fuit exceptione hospitum adventantium, tum DD: Expositorum, tum RR: DD: Abbatum ex Altaha inferiore, et Cella-Dei, qui ambo rogati et invitati fuerunt, ut in futura electione RR: DD: Præsidi assisterent: quibus dein accessit RR: et Perillustris DD. Præsul ac Præpositus Canoniæ ad S. Nicolaum. In Choro autem post Vesperas canonicas decantata fuerunt Vesperae et Vigiliae defunctorum pro RR: DD: Abbate Theobaldo pientissima memoriæ.
Die 12ma. res divinæ in Choro et Ecclesia peragebantur et ordine, quo fieri solet in Dominicis menstruis tempore æstivo. Tertio autem quadrante ad horam Octavam Campana marori Signum fuit datum ad concionem funebrem, quam Plur: R. P. Ioannes Baptista Lackner Benedictinus ex Altaha inferiore ad copiosos auditores dixit RR: DD: Abbatibus in oratorio commorantibus Finita concione RR: DD: Præses solemnem Missam pro defuncto DD: Abbate Theobaldo celebravit, qua peracta V: Conventus ad Tumbam processit ad decantandum Responsorium Libera, quod paullo post excepit Solemnis Missa Votiva in altari B:V:M: a RR: DD: Præsule S. Nicolai celebrata.
Prandium ob frequentiam et copiam hospitum et totius V: Conventus in aula maiori instructum est, quo persoluto et Vesperis finitis V: P. Prior omnes præsentes de V: Conventu et in ordinibus maioribus constitutos ad Prioratum vocari iussit, exploraturus ex singulis, an tres fratres religiosi non nisi ordinibus minoribus initiati ad scrutinium sint admittendi? qui dein prævalente numero votorum negativorum a ferendis in electione suffragiis fuerunt exclusi. Agitatum similiter fuit de quibusdam concordatis capitularibus a necelecto RR: DD: Abbate æsecutioni mandandis, sed admodum tumultiose et animose, ut integer congressus dictæ polonicæ haud dissimilis videretur. Coena dein iterum in aula maiori interfuit V: Conventus integer.
Die 13tia. post Primam convocatis. omnibus ad Capitulum RR: DD: Præses omnes Religiosos ac subditos absolvit ab obedientia RR: DD: Theobaldi piissime defuncti, et sigilla destruxit: mox habito Sermone omnium animos ad futuram electionem præparavit, qui etiam de via Scrictinii observanda consenserunt. Quo actum finito denuo omnes ad V. P. Priorem vocati sunt, deliberaturi, quinam de V. Conventu de putandi sint Vilshovium, excepturi, et deducturi commissarios Eccelsi Regiminis Cæsareo-regii Straubingam, et præmissa collatione haud admodum pacifica nominati fuerunt RR: PP: Granarius, et Prof. Balduinus, qui etiam circa horam 9. cum D. Iudice Vilshovium abierunt, atque sumto ibidem prandio DD: Commissarios L. B. de Pelkofen, et D. de Gaar, D. Hopfel Secretarium, et D. Wufka Cancellistam circa horam 5. Alderspachium introduxerunt consonantibus iterum omnibus campanis. Singuli de V. Conventu cucullis induti, absque tamen praevio hastili, seu Cruce Capitulari, exspectabant in inferiori ambularo, quod ducit ad Abbatiam, et procedentes dein bini ac bini ascendebant cum sequentibus Commissariis ad Cubicula supra Abbatiam collocata, ibique prælectis litteris Comissionalibus tandem dimissi sunt. Prandio vero et cænæ in aula non nisi DD: expositi interfuerunt, reliquis de V. Conventu in refectorio mensa regulari refectis.
Die 14. ceu ipsius Electionis decretoria Res divinæ eo ordine fuerunt peractæ, ut circa mediam septimam penitus essent confectae. Ut primum vero hora Septima insonuit, totus V. Conventus cucullis inductus præeunte Cruce capitulari ex Ecclesia per ambulacrum inferius et portam procedens ascendit ad Cubiculum RR: DD: Præsidis, qui dein stipatus RR: DD: Assistentibus et suo Secretario, præeunte denuo V. Conventu per aulam superiorem ad DD: Commissarios sese contulit, eosque ad Ecclesiam deducit per aream exteriorem inter continuos campanarum pulsus. Scamna in medio Chori disposita occuparunt dextrorsum RR: DD: assistentes, ad Lævam vero DD: Commissarii: Reverendissimus D: Præses autem in sinistro cornu altaris Summi ad celebrandam Missam de Spiritu Sancto inservientibus duobus RR: FF. Acolythis, et R. P. Sacrista, reliquis vero de V. Conventu secundum ordinem Professionis Stalla seu stationes Chori ultro citroque Summo cum silentio occupantibus, circa Postcommunionem vero unus RR: PP: attulit Ciborium, ex quo dein singuli de V. Conventu per manum RR: D. Præsidis S. Synaxin acceperunt: quo facto, Missaque finita flexis genibus et organo marori consonante Hymnus Veni Creator decantabatur, adiectis competentibus versiculis, et Collecta.
Divinis rebus ita peractis, una omnes, ordine, quo supra, ad ædem capitularem pergebant, ubi sedilia in medio disposita fuerunt pro RR: DD: assistentibus et DD: Commissariis. Reveren. dissimus D. Præses autem facta brevi allocutione et consentiente iterum V: Conventu circa formam Electionis omnes absolvit a censuris et impedimentis canonicis, si forte quis aliquo laboraverit. Una omnes dein dicto ordine absque tamen præeunte Hastili seu Cruce Capitulari processerunt ad Refectorium ceu destinatum electionis locum. Tabulae vero ibidem cum scamnis ac sedilibus et ordine fuerunt dispositæ.
Circa immaginem Crucifixi stabant duæ tabulae contiquae tapetibus polymithis instratæ unacum imagine Crucifixi et duobus candelabris, quorum cerer in depositione iuramentorum accensi fuerant: in dextra utriusque tabulæ parte considebante DD: Commissarii penes quos in eadem ferie et versus partem sinistram assidebant RR: DD: assistentes, in quorum medio eminebat RR: D: Præses. Ab isto consessum. non nihil remotius dextrorsum et lovorsum iterum erectæ stabant duæ mensulae, quarum dexteram occuparunt Secretarius Höpfel, et Cancellista Wufka, sinistram vero Secretarius RR: DD: Præsidis, reliqui vero de V. Conventu. Electores, numero 44. hinc atque illinc per latera diffundebantur secundum ordinem Chori. Atque de hoc ordine consessus convenit inter RR: D. Præsidem et DD: Commissarios, etsi antea circa mediam 7. de hoc argumento grave verbilitium Subortum esset, eoquod RR: D: Præses voluerit DD: Commissarios a confessu in eadem tabula excludere.
Rebus ita dispositis processerunt RR: D. Præses RR: DD: assistentes et P. Secretarius ad deponenda consueta iuramenta in Scamno cum in finem præparato, quos secuti sunt de V. Conventu post V. P. Priorem reliqui electores bini et bini, ac tandem ipsum Scratinium inchoatum est, singulis secundum ordinem professionis accedentibus, quo circa mediam 10. felicissime completo, collatoque invicem votorum numero RR: D. Præses clam DD: Commissariis in Catalogo electorum ostendit illum, super quem ob pluralitatem canonicorum votorum sors cecidit, actisque Deo gratiis præcante V. Conventu omnes redierunt ad ædem Capitularem, ubi RR: D: Præses ad Stationem V. P. Prioris procedens, et quærens ex electoribus, an Neoelectum publicari velint? Singulis mox annuentibus, non sine Numine Divum proclamatus est Plurimum RR: ac H: D. P. Otto Doringer Monialium tum temporis in Valle beata Confessarius.
Interposita mox duplica deprecatione, tertia tandem vice urgentibus identidem electoribus tandem Neoelectus consensit in factam electionem, et in medium provocatus mox a DD: Commissariis Cæarea regiis confirmatus est, dein ad iuramentum consuetum et professionem fidei emittendam coram altari evocatus.
Interea R. P. Secretarius foris Neoelectum collectis subditis et populo promulgavit, et dein cum comite P. Cantore Schedulas votorum igne exussit. Quo facto Neoelectus [NB: Annulo in Abbatia [?] subarrhatus est] annulo iam desponsatus, et in Statione D. Abbatis collocatus est. Accepta S. Regula, primaque acclamatione a RR: D. Præside, singuli dein de V. Conventu flexis genibus in manus Neoelecti obedientiam voverunt secundum Regulam S. Benedicti. Quibus peractis secundum usus et statuta S. Ordinis nostri, RR: D. Præses inchoato alta voce Hymno Te Deum etc. Neoelectum pedo Pastorali insignitum interpulsus Campanarum et Choros Hymnum præfatum prosequentes deducit in Ecclesiam, et deductum prius ad altare summum, in Stallum abbatiale collocat, hymnoque absoluto consuetis precibus inaugurat.
Mos dein per DD: Commissarios Neoelectus primo ad Sacristiam perductus, et reseratis Sigillis curam S. Suppellectitilis suscepit, exinde per Ecclesiam in aream publicam eductus, cum integro comitatum ad Abbatiam deductus est: Ubi primo per DD: Commissarios, et dein per RR: D: Præsidem sigilla fuerunt remota, et Neoelectus a DD: Commissariis in Abbatiam sive cubile æstiva habitationi destinatum introductus, moxque iterum ad suscipiendum homagium a famulitio et subditis præstandum eductus est. Inde vero reversus oscula et vota felicissimi Regiminis a filiis suis, et præsentibus hospitibus excepit concrepante insimul ore ignivomo et tubis ac tympanis alte clangentibus.
In Prandio Neoelectus penes DD: Commissarios collocatus est, initiumque datum est Salutationibus et poculo hilaritatis inter sonos tubarum ac pulveres pyrii. Prandio autem finito DD. Commissarii suppellectilem domesticam et ratiocinia cum ærario inspexerunt et conscripserunt, quod negotium usque in alteram diem prorogatum est.
Die tandem 16. tum DD: Abbates tum DD: commissarii discesserunt, sed absque Solemnitatibus, præterquam, quod R. P. Granarius cum D: Iudice et DD: Commissarios Vilshovium usque comitatus sit, eosdemque post sumtum prandium dimiserit.